Ուկրաինայի և Ռուսաստանի միջև խաղաղության հասնելու նոր հնարավորություն կա, ՆԱՏՕ-ի արտաքին գործերի նախարարների ոչ պաշտոնական հանդիպման բացման ժամանակ հայտարարել է Թուրքիայի արտգործնախարարը:
Հաքան Ֆիդանը հավելել է՝ հույս ունի, որ Ստամբուլում կողմերի միջև նախատեսված բանակցությունները նոր էջ կբացեն Ուկրաինայի և Ռուսաստանի միջև խաղաղության գործընթացում:
Երեկ երեկոյան ՌԴ նախագահը հրապարակել էր պատվիրակության կազմը, որում ինքը չկա:
Բանակցություններին կմասնակցեն պաշտպանության փոխնախարար Ալեքսանդր Ֆոմինը, Վլադիմիր Մեդինսկին՝ Պուտինի օգնականը, Իգոր Կոստյուկովը՝ Գլխավոր հետախուզական վարչության տնօրենը:
Ուկրաինայի նախագահ Վլադիմիր Զելենսկին այս շաբաթվա սկզբին հայտարարել էր, որ Պուտինի բացակայությունը հստակ ազդանշան կլինի այն մասին, որ նա իրականում հետաքրքրված չէ խաղաղությամբ:
